Ինչպես տեղեկանում ենք ԱԺ պաշտոնական կայքից, ՀՀ ԱԺ տնտեսական հարցերի մշտական հանձնաժողովը հունիսի 12-ին ՀՀ ԱԺ պատգամավորների, ՀՀ ֆինանսների նախարարի տեղակալների, ՀՀ ԿԲ-ի ներկայացուցիչների, տնտեսության բնագավառի գիտնականների եւ փորձագետների մասնակցությամբ աշխատանքային-մասնագիտական քննարկում են ունեցել եկամտահարկի համահարթեցմանն առնչվող հարցերի շուրջ:
ՀՀ ֆինանսների նախարարի տեղակալ Արման Պողոսյանը մեկ անգամ եւս փաստել է, որ տնտեսությունը պետք է միտված լինի արտահանմանը, նախատեսվել է շահութահարկի բեռի նվազում՝ 20 տոկոսի փոխարեն սահմանվում 18 տոկոս, ինչը երկարաժամկետ հատվածում կհանգեցնի շուրջ 0.8 տոկոսային կետով ավելի տնտեսական աճի՝ նպաստավոր պայմաններ ստեղծելով ներդրումների համար: Եկամտահարկը սահմանվում է 23 տոկոս, որը տարեցտարի կնվազի մինչեւ 20 տոկոսի:
«Հարկման այս համակարգը ֆիսկալ անկայունության ռիսկեր չի ստեղծի»,-նշել է փոխնախարարը:
ՀՀ ֆինանսների նախարարի տեղակալ Արմեն Հայրապետյանն անդրադարձել է արտահանմանն ու նշել, որ օրենսդրական փաթեթը կյանքի կոչվելով հնարավոր կլինի ստեղծել արտահանման մոդելի երկիր: Ակնկալվում է ամսվա կտրվածքով արտահանման 0,8 տոկոս աճ, ներդրումների աճը ամսվա կտրվածքով կկազմի 1,5 տոկոս: Տեսանելի ապագայում ընդհանուր տնտեսական աճը նախատեսվում է 5,6 տոկոս: Բնակչության կենսամակարդակին առնչվող ցուցանիշները կբարելավվեն: Սպառման աճը գնահատվում է 0.3-0.4 տոկոսային կետի չափով, իսկ զբաղվածության աճը` շուրջ 0.5 տոկոսային կետի չափով:
«Քաղաքական դիսկուրս» հանդեսի համախմբագիր Վահրամ Սողոմոնյանի կարծիքով՝ եկամտահարկի համահարթեցումն հակասահմանադրական է: Ըստ նրա՝ բարձր աշխատավարձը քիչ է հարկվում, իսկ 150 հազար դրամ աշխատավարձ ստացողները շատ:
Տնտեսագիտության դոկտոր Թաթուլ Մանասերյանն առաջարկել է սահմանել հարկման շեմ, որը հնարավորություն կտա լուծել մի շարք սոցիալական խնդիրներ:
ՀՀ ֆինանսների նախկին նախարար Վարդան Արամյանը կարեւորել է արտահանման խթանումն ու հարկաբյուջետային կայունության ապահովումը: Ըստ նրա՝ պետք է ներդրվի եկամտահարկի հայտարարագրման համակարգ: Այս տեսակետին կողմ է արտահայտվել նաեւ փորձագետ Հովհաննես Ավետիսյանը: Նա առաջարկել է 20-21 տոկոս հարկման շեմ սահմանել մինչեւ 500 հազար դրամ աշխատավարձ ստացողների համար:
ՀՀ ԿԲ-ի ներկայացուցիչ Մարտին Գալստյանը փաստել է, որ նվազեցնելով եկամտահարկը եւ բարձրացնելով գույքահարկը՝ տասը տարվա կտրվածքով կապահովվի տնտեսական դրական դինամիկա: Նրա խոսքով՝ գործող հարկման համակարգը մեր երկրի տնտեսությունը կանգնեցրել է բազմաթիվ խնդիրների առաջ:
ՀՀ ֆինանսների փոխնախարար Արման Պողոսյանը տեղեկացրել է, որ ՀԲ-ի մասնագետները դրական են արձագանքել ՀՀ հարկային օրենսգրքի փոփոխություններին: